Шуҷоати қаҳрамонписарони Ватан
Шуҷоати қаҳрамонписарони Ватан Дар толори ҷамоати деҳоти Исмоил ва муассисаи таҳсилоти миёнаи умумии №9 бахшида ба таҷлили 30-солагии аз марзи Афғонистон баровардани қўшунҳои собиқ Иттиҳоди Шўравӣ бо раиси Ташкилоти ҷамъиятии иттифоқи собиқадорони ҷанги Афғонистон дар вилоят Комилҷон Содиқов, дар ноҳияи Бобоҷон Ғафуров Ҳасанбой Каримов, дар шаҳри Хуҷанд Муқимҷон Қобилов, Раиси ҷамоати деҳоти Исмоил Ғуломҷон Мирзоев ва раисони иттифоқи собиқадорони ҷанги Афғонистон дар ҷамоатҳои деҳот ва омўзгорону хонандагони синфҳои болоӣ, ки ба сафи хизмати ҳарбӣ омода карда мешаванд, конфронси амалӣ - бадеӣ баргузор гардид. Бахши ҷаласаи машваратии конфронс дар толори бинои ҷамоати деҳоти Исмоил сурат гирифта, меҳмонон аз утоқи кории таъсисдодашуда барои намояндагони Ташкилоти ҷамъиятии иттифоқи собиқадорони ҷанговарони интернатсионалист дидан намуданд. Раиси ташкилоти иттифоқи собиқадорони ҷанги Афғонистон дар ноҳияи Бобоҷон Ғафуров Ҳасанбой Каримов ҳамаи ҷанговарони интернатсионалистро ба 30-солагии аз марзи Афғонистон баровардани қўшунҳои собиқ Иттиҳоди Шўравӣ шодбош гуфта, қайд намуд, ки дар дигар ҷамоатҳо низ ин масъаларо дар мадди аввал гузоранд. Раиси ҷамоати Исмоил Ғуломҷон Мирзоев ва Раиси шўрои собиқадорони ҷанги Афғонистон ҷанговари интернатсионалист Мақсуд Эргашев аз корнамоиҳои фарзандони содиқи Ватан, ки дар ҳимояи ҳамсоякишвари мо –Афғонистон саҳми қаҳрамонӣ нишон додаанд, сухан намуданд. Гуфта шуд, ки аз як муассисаи таълимӣ аз ҷамоати Исмоил 4 нафар дар ин ҷанг қаҳрамонӣ нишон дода, се нафар дар задухўрдҳо захм бардошта ба Ватан баргаштанд ва як нафарашон Тоҳир Саидаҳмедов қаҳрамонона ҳалок гардид. Раиси Шўрои собиқадорони ҷанги Афғонистон, ҷанговарони интернатсионалист дар вилоят ва шаҳри Хуҷанд Комилҷон Содиқов ва Муқимҷон Қобилов аз бурду бохти он рўзҳои вазнин ёдовар шуда, сулҳу субот, фазои осудаву ороми даврони истиқлолият ва қаҳрамониву сарсупурдагии сарвари давлат муҳтарам Эмомалӣ Раҳмонро беҳтарин неъмат арзёбӣ намуда, зикр доштанд, ки - содиқона хизмат намудан ба Ватан қарзи ҳар як ҷавонписар аст. Бояд дар вуҷуди ҳар як фард ҳисси ватандўстиву меҳанпарастӣ ҷўш занад ва баҳри ҳимояи марзу буми Ватан ҳамеша омода бошад. Ҷанговарон хонандагонро ба тарбияи ватандўстӣ, хештаншиносӣ, худогоҳӣ ва ифтихори миллӣ даъват намуда, баён доштанд, ки хотирахои ин ҷанги мудҳиш то ҳанўз дар ёдҳо нақш бастааст ва ҳаргиз зудуда нахоҳад шуд. Бахши дуввуми конфронс бо қабул намудани муҳассилин ба сафи созмони хонандагон дар муассисаи таҳсилоти миёнаи умумии №9 оғоз гардида, меҳмонон аз дастранҷи хонандагони муассиса ва намоиши ҳунарҳои мардумӣ дидан карданд. Муовини директор оид ба корҳои тарбиявӣ Эргашев Эргаш чорабиниро ифтитоҳ намуда, зикр доштанд, ки Ватан дар шинохти маънавият, одамият ва арзи ҳастӣ моро тарбия намуда, аз ҳар газанду осеб канорагирамон аст. Мо низ қарзи фарзандии хешро дар назди Ватан ба поён расонем, баҳри пешрафту тараққиёт ва ҳифзи он ҷидду ҷаҳд намоем. Зеро Ватан Модар аст. Омўзгорони муассиса Гулзора Азимова ва Мастона Эргашева дар мавзўи «Қаҳрамонписарони Ватан» ва «Иттифоки тавоно» бахшида ба 30 солагии баровардани қўшунҳои Иттиҳоди Шўравӣ аз марзи Афғнистон ва хотираи шаҳидон маърўза намуданд. Тариқи тахтаи элекронӣ аз лаҳзаҳои задухўрдҳои ҷангӣ дар марзи Афғонистон ва корнамоиҳои ҷанговарони интернатсионалист филомнома ва таҳти унвони «Хотираҳо аз ҳаёти ҷангии ҷанговар интернатсионалист Тоҳир Саидаҳмедов» аз ҷониби муҳассилин саҳнаи тарбиявӣ ба намоиш гузошта шуд. Ҷаговари интернатсионалист Носирҷон Эгамбердиев аз ҷасорату мардонагии фарзандони Ватан, қаҳрамониҳои родмардони миллати тоҷик ёдовар шуда, иброз дошт, ки - Ватан даргоҳи муқаддас ва беолоиш, хонаи умед, бахшандаи бахту саодат аст. Ҳиссиёти ватандўстӣ ин худ садоқат ба Ватан, саъю кўшиш дар ободонӣ ва хизмати софдилона ба он мебошад. Ҳасанбой Каримов иштироки фаъолонаи толибилмонро дар ҷорабинии имрўза хеле хуб арзёбӣ намуда, ба хонандагон таъкид сохт, ки ҳушёрии сиёсиро аз даст надиҳанд, бештар омўзанд ва номбардори мактаб, падару модар ва Ватани азизи хеш бошанд. Намояндаи шуъбаи маорифи ноҳия Бихалича Зоҳидова ва директори муассиса Абдуваҳҳоб Илмаминов ташрифи меҳмонон ва баргузории чунин чорабиниро баҳри насли наврасу ҷавон мактаби омўзиш ва парвариш арзёбӣ намуд. Гуфта шуд, ки баргузории чунин чорабиниҳо баҳри баланд бардоштани тарбияи ғоявӣ, миллӣ ва ватандўстиву хештаншиносии хонандагон мусоидат мекунад. Сурудҳои дилнавози Аълочиёни фарҳанги Тоҷикистон Аловиддин ва Ҳилолиддин Шамсиевҳо ва барномаи фарҳангии омоданамудаи хонандагон, ки фарогири мавзўи ватандўстиву ватанпарастии иборат аз шеъру тарона ва рақсу суруд буд, чорабиниро таровати тоза бахшид. Дар фарҷом ҷанговарон ва иштирокдорони чорабинӣ бо Ифтихорнома, Сипосномаи Раиси Шўрои иттифоқи собиқадорони ҷанги Афғонистон дар вилояти Суғд Комилҷон Содиқов ва ноҳияи Бобоҷон Ғафуров Ҳасанбой Каримов ва ҳамзамон Носирҷон Эгамбердиев бо нишони сарисинагии «30-солагии баровардани қўшунҳои Иттиҳоди Шўравӣ аз марзи Афғонистон» қадршиносӣ карда шуданд. Санаи баргузорӣ: 2019-01-29
Санаи дохилшуда: 2019-03-25